കുറുംകവിതകള്‍ # 1

കാലപ്പഴക്കം
----------------------
ഉമ്മയുടെ ചുമലിലെ
തഴമ്പ് കണ്ടാലറിയാം
ഉപ്പ കൈവീശിപ്പോയ
കാലത്തിന്റെ പഴക്കം..!

കൂട്
---------
നിറയെ ചില്ലകളുള്ള
നിന്റെ പ്രണയത്തിൽ
ഞാനും ഒരു കൂട് പണിയട്ടെ...!

വീട്
-------
പണിയുമ്പോൾ
സ്ഥാനം നോക്കണം
അകം നിറയെ
സ്നേഹം നിറയാൻ...!

ചിരി
------------
നനഞ്ഞ ഓർമ്മകളെ
കാലത്തിന്റെ അയയിൽ
ഉണക്കാനിടുന്നു
ഒരു ചിരിയൻക്കാറ്റ്..!

മോഹം
----------------
ഞാനൊരു മരുഭൂമി
നീയൊരു മഴമേഘവും
പെയ്യാതെ മോഹിപ്പിക്കുന്നു..!

വിരഹം
--------------
പറഞ്ഞു വെച്ച അവസാന
മൂളലിലും, തിരിച്ചറിയുന്നുണ്ട്
പറയാത്ത വാക്കിന്റെ വിരഹം...!

നാക്ക്
-----------
ഉള്ളം നിറഞ്ഞവരെ
ശത്രുക്കളാക്കുവാൻ
ഉറയിൽ സൂക്ഷിക്കും വാൾ..!

ചങ്ങാതി
----------------
മിഴികളിൽ പുഞ്ചിരി നിറച്ച്
മൊഴികളിൽ തണൽ വിരിച്ച്
മൊഴിയാതെ മൊഴിയും
ചങ്ങാതി,
നീ എനിക്ക് കണ്ണാടിയെന്ന്...!


കടപ്പാട്
--------------
പെയ്ത മഴയിലേക്ക്‌
ഇനി എന്നാണ്
നമ്മൊളൊന്നു തിരിച്ചു പെയ്യുക..!

ഹൈക്കു # 1

വീട് പണിയുമ്പോൾ കേൾക്കാം
കൂട് നഷ്ടപ്പെടുന്ന
പക്ഷികളുടെ കരച്ചിൽ.
-------------------------------

ഒരു കര തെളിയുമ്പോൾ
ഒരു പുഴ
മെലിയുകയാണ്
--------------------------

നീ എന്ന വിളക്കില്‍
എരിഞ്ഞോട്ടെ
ഞാന്‍ എന്ന ഇയ്യാംപാറ്റ.
----------------------------------

ഉണങ്ങിയ മരത്തിൽ
ഒരു മുല്ലപടർപ്പെന്നപോൽ നീ
എന്തിനാണ് എന്നിലേക്കിങ്ങനെ.
-------------------------------------------

നിന്റെ മാറാല പിടിച്ച
മനസൊന്നു വൃത്തിയാക്കുമ്പോൾ
തെളിഞ്ഞു വരും ഞാൻ എന്ന നീ.
-------------------------------------------

മുറിച്ചു നൽകിയ ചെവിയിൽ നിന്നും
ഇപ്പോഴും ഇറ്റുന്നുണ്ട്
നിന്നോടുള്ള മാരക പ്രണയം.
----------------------------------------

മരണമേ ചങ്ങാതി
നിന്നിലേക്കടുക്കുന്നു
ജീവിതമെന്ന ഞാൻ.
------------------------------------

നനഞ്ഞ ഓർമ്മകളെ
ഉണക്കാനിടുന്നു
ഒരു ചിരിയൻക്കാറ്റ്
--------------------------------------

രണ്ടക്ഷരത്തിന്‍റെ ഗര്‍വ്വല്ല
ഒരു വേലിക്കകത്തും
തളച്ചിടാനുമാവില്ല.